@@ العقــد النفسـيه .. في " بزران " السعوديــه @@

@@ العقــد النفسـيه .. في " بزران " السعوديــه @@


منذ طفولة الطفل السعودي .. وهو يتعرض للإضطهادات .. والترجيم والتقبيص .. وحتى لو كان الطفل جميلاً ... فلابد أن يأخذ نصيبه من تقبيص الخدود ... وطبعات أرواج الحريم على الخد من أسوء ما يتعرض له البزر السعودي ... خاصه أن كان هذا الروج من أسواق السويلم أو أي محل من محلات أبو يمن طاح بالمرق قعد له ساعه واحترق


عقدة الأسم
في بداية الولاده ... أول مايتعرض له البزر السعنن .. هو الاضطهاد باختيار الاسم ..
عزيزي المواطن ... إذا كان اسم أبوك أو جدك خليّوي وإلا نبهان .. وش ذنب طفل توه طالع على الحياة يتسمى هالاسم ؟
قمة الاضطهاد وضيقة الصدر لما الواحد صغير واسمه أسم شايب .. وش هالعيشه ياعالم ؟

أو مثلا يطلع على الدنيا واسمه متعب والا حزنان .. سلامات ؟
لو يجيه ضيقه والا شي قال بس هذا من اسمي ...

أصلاً من السنه أنه الواحد يختار الأسم المناسب والي له معنى حلو لولده ..

وبالمناسبه بقولكم سالفه ..

مره وحده في البنك أسمها وفقه المهم إنها غيرت أسمها .. وتسولف مع خالتي .. قالت لها خالتي تحبين نناديك بأسمك الجديد والا وفقه ؟

قالت لاااااااااااااا تكفين لاتذكريني

هذا أمي وأبوي تهاوشو مره .. وامي حامل ... قام قالها تروح لبيت أهلها

راحت لبيت أهلها وولدت .. وسمت بنتها زعله المهم أنه رجعها .. يوم رجعها حملت بعد .. احتفال وجابتني وسمتني وفقه .. يعني انهم رجعو يتوافقون وكذا
المهم ان ذي وفقه غيرت أسمها بس للحين زعله ذي ماغيرته عادي مخليته على ماهو ..
انولد بالعيد سمّوه عيد .. انولد وشكله مقبول ووش ملحه .. سموه مقبول أنولد بالشرقيه سموه بحر

سلامات يآعالم .. خلاص فكو بزارينكم من ذا الاسماء

عقدة منت ولدنا

اللهم آجرني يارب .. ياخواني سووو فيني سواة .. قسم بالله انه حتني وسوسه صدق
عاد نعرف وحده من أقاربنا جايبه ولدين من البوسنه والهرسك ..
قلت صدق لو اني مثلهم أهلي جايبيني مناك وش دراني .. ماقالوه اخواني عبث
بالاخير يوم أني كبرت شوي عرفت أنهم مجرمين ..
وصرت أنا أسويها في اخوي الصغير بس على أنجس
طبعا أتوقع مافيه أحد ما أنقال له منت ولدنا


عقدة أخوك الصغير

سبحان الله الأهل السعوديين ماعندهم روح الحريه والاشياء ذي .. وان كل واحد حر بأشيائه
يعني دايم الكبير يضطهدونه عشان الصغير وإذا قال شي
قالو له انت الكبير وهذا الصغير

ماينلامون اذا قامو يفغصون أخوانهم الصغار
أبو الحاله الي كذا ...
تخيل أنت مدلع وتنام بين أمك وابوك ..
وتمر عليك الايام وتتشوت من الغرفه وتنام في الظلام الحالك لحالك
ليه ؟
عشان اخوك الصغير وانت كبرت خلاص .. أبو القهر الي كذا

عشان كذا أنا أقترح الاب والام لما يجيبون طفل ثاني يذبحون الاول
الجد عاد لما يجيبون طفل ثاني يساوونهم بالمعامله ... ولا يحسسون الاول انه ذا الصغير الفطفوط جاء مكانه وأخذ الدلع كله ...


عقدة أخوك الكبير

ياشين الاهل الي يحسسون الاخ الكبير أنه أبو سري ( على وزن عريف سري )

مثلا أبي اطلع للبقاله ...
لا ماتطلع لازم معاك أخوك الكبير ..
لو استبدلوها مثلا لا تطلع لحالك نخاف عليك أحسن
أو مثلا أخوك الكبير لا تتكلم عليه ... لا تقول له شي خله يمسح فيك البلاط .. كبير هو .. وجع

أجل ياعالم والله اني ما انساها
مره وانا صغيره واحد من إخواني .. يقول يالله خنتسابق من ياكل مناديل أكثر
والله اني كليت مناديل كثييير مره واتغصب عليها عشان أفوز .. وبالاخير صار هو يرميها وانا أبلعها صدق ..
ولا انقاله شي


عقدة شوفي فلانه
أشين شي بالحياة أنك تقارن شخص بشخص ... وخصوصا الصغار
حنا نبيهم يغارون ويتعدلون ..
لكن والله غلط هالحركه مايجي منها الا الحقد ترى


عقدة عيب


أما عيب هذي الكلمه أستغفر الله بس .. ياكثر ماسمعتها .. ويقولونها بدف يعني

أحيان نفز واحنا صغار .. بزر طلع اندرويرها وش المشكله طيب ؟
ماتدري الا امك والا جدتك تجرك عيب غطي

عيب لاتجلسين كذا عيب لاتقولين كذا كل شي عيب عيب عيب ..
لين تجيك ردة فعل وكل شي عيب تسوينه

يعني وش فيها لو مثلا شفتي بنتك الصغيره جالسه جلسه ماهي زينه وطالعه البلاوي المتلتله
قولي لها اجلسي كذا حبيبتي هذي الجلسه مو حلوه
مو لازم تروعينها وعيب وتمسكينها وتغطينها شوي وتجرحينها من الحماس

عناد
عناد الاطفال يونس .. لكن داخله يولد شي يشبه النذاله كذا

يعني أتذكر دايم أخواني يعاندوني وانا صغيره ... تحترق اعصاابي وحده من خواتي تسوي حركات بوجهها .. وكنت أطالعها وانقهررررررررر
لين صرت مثلها أطلع العقد الي تسويها فيني بغيري
أحلى حل ..


إذا كبرتو

من كثر ماكانت تنقال لنا صرنا نتمنى اننا نكبر بسرعه ..
والحين يوم كبرنا ... كل العالم أشوفهم رازين بتواقيعهم وعناوين الموضوعات ( كبرنا وليتنا ماكبرنا )
والي جالس يشعر ... ويقول ( ياليت ان الزمن يرجع ورى والليالي تدور )
والي تقول ( ليتني طفله كبر همومي لعبتي )

جتنا صدمه توقعنا ااننا اذا كبرنا بنصير وناسه ... وتتحقق كل احلامنا
من كثر مايقولون اذا كبرتو ..
المشكله أننا نشوف وجيه الكبار دايم معبسه ونفسيتهم خايسه .. بس مافكرنا زين

تحيااااتي

قلق

مرور تشكرين عليهوو << تراها ضمه

مجهلوله

نورتي ياقلبي

روح

الله لا يلومك ترى عندنا نفس الشي
عموما منورهـ